සමාජ මාධ්‍ය වල පැතිරෙන ප්‍රචාර අසත්‍යයි – ක්‍රීඩා ඇමති

ක්‍රිකට් තරග මුදලට පාවා දුන් බවට ශ්‍රී ලංකා ක්‍රිකට් කණ්ඩායමේ ඇතැම් ක්‍රීඩකයින්ගේ නම් ඇතුලත් කර විවිධ වෙබ් අඩවි හා සමාජ ජාල මාධ්‍ය ඔස්සේ ගෙන යන ප්‍රචාර සම්පූර්ණයෙන්ම අසත්‍ය බව ක්‍රීඩා අමාත්‍ය ෆයිසර් මුස්තාෆා ප්‍රකාශ කර සිටියි.

විවිධ පාර්ශවයන්ගෙන් ලැබුණු පැමිණිලි හා තොරතුරු අනුව ජාත්‍යන්තර ක්‍රිකට් කවුන්සිලය ශ්‍රී ලංකා ක්‍රිකට් කණ්ඩායමේ ක්‍රීඩකයින් පිළිබදව මේ වන විට පරීක්ෂණයක් පවත්වන නමුත් මේ වනතෙක් නම් වශයෙන් කිසිදු ක්‍රීඩකයෙක් මුදලට තරග පාවාදුන් බවට නිළ වශයෙන් නිවේදනය කර නොමැතිබව ක්‍රීඩා අමාත්‍යවරයා සදහන් කර සිටියි.

විවිධ පුද්ගලයන් විසින් මෙලෙස වගකීම් විරහිතව සමාජ ජාල මාධ්‍ය ඔස්සේ ක්‍රිකට් කණ්ඩායමේ ඇතැම් ක්‍රීඩකයින්ගේ නම් යොදාගෙන සිදුකරන මෙම ක්‍රියාව වැරදි බවත්, එමගින් වරදක් කර නොමැති ක්‍රීඩකයින්ගේ කීර්තිනාමය හා ශ්‍රී ලංකා ක්‍රිකට් කණ්ඩායමට සිදුවන හානිය ඉතා විශාල බවයි ඇමතිවරයා පෙන්වා දෙන්නේ.