පොලිතීන් වැටලීම ක්‍රියාත්මක කිරීමට යයි

පොලිතීන් තහනම සැප්තැම්බර් 1 වැනිදා සිට ක‍්‍රියාත්මක නමුත් ඒ සම්බන්ධයෙන් වැටලීම් සිදුකිරීම ආදිය ආරම්භ වන්නේ 2018 ජනවාරි 1 වැනි දා සිට බව සම කැබිනට් ප‍්‍රකාශක, සෞඛ්‍ය, පෝෂණ හා දේශීය වෛද්‍ය අමාත්‍ය රාජිත සේනාරත්න මහතා අද (23) පැවසීය.

මෙම තහනම ක‍්‍රියාත්මක කිරීම සම්බන්ධයෙන් බලපෑමට ලක්වන නිෂ්පාදකයින්, පොලිතීන් ආශ‍්‍රිත ඇසුරුම්කරණ කර්මාන්තවල නිරත වන්නන් හා පොලිතීන් තොග වෙළදුන් පොලිතීන් සඳහා විකල්ප හඳුන්වා දී ඔවුන් එම විකල්ප වෙත යොමු කිරීම සඳහා ජනවාරි 1 වැනිදා දක්වා කාලය වෙන් කරන බව ද ඇමැතිවරයා කීවේය.

අමාත්‍යවරයා මේ බව පැවසුවේ රජයේ ප‍්‍රවෘත්ති දෙපාර්තමේන්තුවේදී අද (23) පැවති කැබිනට් තීරණ දැනුම්දීමේ මාධ්‍ය හමුවේදීය.

මෙහිදී අදහස් දැක්වූ සම කැබිනට් ප‍්‍රකාශක, ඉඩම් හා පාර්ලිමේන්තු කටයුතු අමාත්‍ය ගයන්ත කරුණාතිලක මහතා පැවසුවේ පොලිතීන් ආශ‍්‍රිත කර්මාන්තයන්හි නිරත වූවන් ක‍්‍රමානුකූලව විකල්පයන්ට යොමුකිරීම සඳහා කර්මාන්ත හා වාණිජ කටයුතු අමාත්‍යාංශ ලේකම්වරයාගේ ප‍්‍රධානත්වයෙන් යුත් කමිටුවක් පත්කිරීමට අමාත්‍ය මණ්ඩලය තීරණය කළ බවයි.

මුදල් අමාත්‍යාංශය, මධ්‍යම පරිසර අධිකාරිය ආදී අදාළ ආයතනවල නියෝජිතයින්ගෙන් එම කමිටුව සමන්විත බව ද ගයන්ත කරුණාතිලක මහතා කීවේය.